Татьяна Васильевна СИДОРОВА, Мэҥэ Хаҥалас үөрэҕин управлениетын отделын салайааччыта:    

      Төһө да кэм-кэрдии, дьон-сэргэ олоҕо-дьаһаҕа уларыйан истэр биһиги көлүөнэ төрөппүттэрбит үгэстэрин илдьэ сылдьабыт, оҕолорбутугар тиэрдэргэ кыһаллабыт. Бастатан туран, Саҥа дьылы көрсөргө үлэ-хамнас барыта үмүрүйүөхтээх. Иэс-күүс, сиппэтэх үлэ дьиэҕэ даҕаны, үлэҕэ даҕаны хаалыа суохтаах диэнинэн салайтаран сыл бүтүүтэ түбүгүрэбит. Дьиэбитин-уоппутун хомунабыт, симиибит, ас-үөл бэлэмнэнэбит, хаһаанабыт, чугас дьоммутугар бэлэхпитин булабыт.

     Иккиһинэн, харыйабытын симииргэ билигин да эргэ, сэбиэскэй кэм оонньуурдарынан симиибит. Сороҕо бэйэбин кытта саастыы оонньуурдар бааллар. Ол иһин харыйа симээһинэ миэхэ оҕо сааска төннүү, ааспыт кэми истиҥник санааһын буолар.

    Үсүһүнэн, эбээбиттэн, ийэбиттэн кэлбит үгэс- остуол хотойорунан ас. Олус сиэдэрэйдээн да буолбатар, үүнэр дьыл байылыат, уйгу-быйаҥ буоллун диэн төһө кыалларынан дьиэ-кэргэн сөбүлүүр астарын бэлэмниибит. Сорох аһы онно анаан эрдэттэн уурунабыт. Оччоҕуна дьэдьэн барыанньата самаан сайыны санатыа, күһүҥҥү кус булт мүччүргэннээх түгэннэригэр төнүннэриэ, куобах кэһиилээн ыыппыт аймах дьоммутугар махталынан аҕыннарыа …

   Саҥа дьыл салаллан кэлбитинэн итии-истиҥ эҕэрдэ! Хас биирдиигитигэр үөрүү-көтүү, дьол-соргу тосхойдун! 

Василий Михайлович ВЛАДИМИРОВ, Дьокуускай куорат №2-дээх орто оскуолатын дириэктэрэ: 

Саҥа дьылы кыралыын-улаханныын бука бары  күүтэбит. Бу бырааһынньык ураты алыптаах,  дьоҥҥо-сэргэҕэ  үгүс үөрүүнү түстүүр үтүө үгэстэрдээх. Ол курдук, мин уһуйаан саҕаттан бодоруһан бииргэ улааппыт доҕотторбунаан сыл аайы тохсунньу ый 2 күнүгэр хайаан да көрсөбүт. Бары мустан төрөөбүт дойдубут ыраас салгынынан тыынан, ирэ-хоро кэпсэтэн, инникини торумнаан саҥа сылбытын саҕалыырбытын олус астынабыт.

Ксана Семеновна САВВИНА, Дьокуускай куорат №26-дээх орто оскуолатын дириэктэри солбуйааччы:

            Саҥа сылы көрсө хайаан да гжель оҥоһуга сыл бэлиэтин ылабын. Олох кыра оҥоһуктары көрдөөн була сатыыбын. Сыл аайы ылар буоламмын, 12 сыл буола-буола эргийэн кэлэр. Онон сыл бэлиэтэ буолбут кыыллар коллекциялара мунньулунна.

Варвара Константиновна ЕФИМОВА, Таатта, Игидэй орто оскуолата:

            Саҥа дьылга олох ыбылы кэтилиэт, пельмень, тефтель эрдэттэн астанарбын сөбүлүүбүн. Дьааһыгынан мороженнай, фрукта арааһын ылабын. Бырааһынньык остуолугар тото-хана аһаан, эҕэрдэлэһэн баран, ханна да барбакка телевизор көрөрбүн туохтан да ордоробун.

Оҕолорум кыра эрдэхтэриттэн билиҥҥээҥҥэ диэри туос обургу чабычахха уонна ыаҕыйаҕа тобус толору минньигэс астары мунньабын, уһун өрөбүлү быһа соһо сылдьан сиибит.

Сардана Терентьевна КАРДАШЕВСКАЯ, Чурапчы үөрэҕин управлениетын отделын салайааччыта: 

            Биһиги ыал хайаан даҕаны ахсынньы 1  күнүгэр саҥа дьыл тыына дьиэ -кэргэҥҥэ киирдин диэн харыйабытын симиибит. Алаһа дьиэбитин бырааһынньыкка бэлэмниирбитигэр кумааҕыттан бэйэбит оҥорбут киэргэлбит сыл аайы баар буолар.   Сандалыга сахалыы ас арааһын толору уурарбытын сөбүлүүбүт.

Татьяна Ивановна ИВАНОВА, Амма, Болугур орто оскуолатын дириэктэрэ:

            Оскуолага Сана дьылы оҕолорго иккитэ бырааһынньыктыыбыт. Бастакы күн Сана дьыллааҕы бал-маскарад буолар. Иккис күн улахан кылаас оҕолоругар, выпускниктарга анаан “Голубой огонек” тэрийэбит. Сиэдэрэй астаах остуол төгүрүччү олорон ирэ-хоро кэпсэтии, музыкальнай эҕэрдэлэр утуу-субуу бараллар. “Две звезды” курдук күрэххэ үөрэнээччи учууталын кытта үнкүүлүүр, ыллыыр. Былырыын, быйыл, хомойуох иһин, пандемиянан сибээстээн буолбата. Ол да буоллар, бары үөрэ-көтө саҥа дьылы элбэх ситиһиилэрдээх, инникигэ эрэллээх көрсөн эрэбит.

Варвара Васильевна АММОСОВА, Үөрэҕи сайыннарар уонна идэни үрдэтэр институт:

            Сылы түмүктүүр күҥҥэ биһиги үгэс быһыытынан эбэлээхпитигэр бары мустабыт. Ааһан эрэр сылга үлэбит-хамнаспыт, олохпут-дьаһахпыт хайдах, туох буолбутун кэпсиир толору хаартыскалаах альбому отчуот курдук дьоммутугар биэрэбит. Сиэннэр туспа ыал буолан бэйэлэрин дьиэ кэргэннэрин сыллааҕы «отчуоттарын» оҥороллор. Онон альбом сыл ахсын бэриллэр буолан, бэртээхэй архыып мунньуллан иһэр.

By admin

Хоруйдаа

Эн e-mail-ыҥ көрдөрүллүө суоҕа.