Алтынньы 12 күнүгэр С.А.Новгородов аатынан Чурапчы орто оскуолатыгар оскуола 150 сыллаах үбүлүөйдээх тэрээһиннэрин чэрчитинэн өрөспүүбүлүкэтээҕи «Диалог учителя-ученика-родителя: реализация требований ФГОС в МБОУ Чурапчинская СОШ им. С.А. Новгородова» сэминээр  буолан ааста. Сүрүн сыалынан учууталлар  ФГҮӨС ирдэбилин толорор ньымаларын уопутун тарҕатыы буолла. Уопсайа 96 ыалдьыт кытынна. Ол курдук Тааттаттан, Мэҥэ-Хаҥаластан, Томпо улууһуттан уонна улууспут  оскуолаларыттан учууталлар уонна дириэктэри үөрэх чааһыгар солбуйааччылар кэлэн биһиги учууталларбыт аһаҕас уруоктарын, маастар-кылаастарын  үрдүктүк сыаналаан бардылар. Сэминээр үөрүүлээх арыллыытыгар оҕолор уонна учууталлар толорууларыгар оскуолабыт гимн ырыата ыланна. Оскуолабыт дириэктэрэ Надежда Васильевна Уарова  эҕэрдэ тыл эттэ, оскуола үлэтин кылгастык билиһиннэрдэ. Чурапчы улууһун үөрэҕин управлениетын салайааччыта Юрий Павлович Посельскай  сэминээр кыттыылаахтарыгар таһаарыылаах үлэни баҕарда. Ыалдьыттар  үрдүк уонна бастакы категориялаах учууталлар уруоктарыгар сырыттылар. Ол курдук, алын сүһүөх учууталлара Максимова Л.Е. нуучча тылыгар, Артемьева А.А. литература ааҕыытыгар, Старостина П.Н. саха тылыгар аһаҕас уруоктары көрдөрөдүлэр, маны таһынан уруһуй уруогун Баягантаева А.Г. 4 кылаастарга ыытта. Орто уонна улахан сүһүөх үөрэнээччилэргэ, история уруогун Оконешникова А.В., обществознание- Макарова Л.К., омук тыла — Ким Н.Д., Шестакова О.А., нуучча тыла- Сивцева Е.И., саха тыла- Неустроева И.И., биология — Спиридонова А.А., математика- Соловьева Л.И., физика- Макарова С.И., информационнай технология –Григорьева А.Е., физкультура –Захаров Н.В.,  олус интириэһинэй уруоктары ыыттылар. Улахан уопуттаах Назарова Д.В., Платонова С.Д., Седалищева С.А. аһаҕас кылаас чаастарын ыыттылар. Фитнес-аэробика,  иис,  Worldskills «ветеренария”, “ химическай анализ”, “ эстетическай косметология” компетенциялара, «Оонньоо, бил, кыай”  уруок таһынааҕы дьарыктары Аммосова В.И., Попова А.С., Терютина Е.Н., Саввина С.А., Кононова А.С. көрдөрдүлэр. “Сатабыл эйгэтэ” оҕолор, төрөппүттэр, учууталлар  маастар кылаастарын эйгэтэ тэриллэн кэлбит ыалдьыттар оҕолор дьарыктарын кытта сиһилии билистилэр, бэйэлэрэ онорон, холонон көрдүлэр. Манна өрөспүүблүкэбитигэр саҥа сайдан эрэр Го интеллектуальнай оонньууну,   оҕолор компьютерынан араас программаларынан оҥорбут бырайыактарын,  кыргыттар оҥорор киэргэллэрин, айар талааннаах Артем Седалищевы интириэһиргээн, сэргээн көрдүлэр. Оҕолор бэйэлэрин дьарыктарын, талааннарын киэн эйгэҕэ билиһиннэрэн саҥа уопуту ыллылар.

 Сэминээр устата методическай выставка уонна учууталлар пособиеларын атыыта тэрилиннэ.

Күн иккис аҥарыгар инновационнай бырайыактарынан 13 маастар-кылаас ыытылынна, маны тэҥэ төрөппүт Сүбэтэ бэйэтин үлэтин сырдатар маастар-кылаас көрдөрдө. Кэлбит дьон “Дарханнар” военно-патриотическай кулууп үлэтин, физкультура учууталлара онорбут эти-сиини чэбдигирдэр, уруокка туттуллар тренажердарын,  кылаастар профориентацияҕа  бырайыактарын, төрөппүт кыттыылаах “Сатабыл» бырайыагы   сэргээтилэр.

Сэминээр дьаһалларын С.Н.Донской – II аатынан Үөрэҕи сайыннарар уонна идэни үрдэтэр  үнүстүүт    бастакы солбуйааччыта, филология билимин кандидата  Николай Иннокентьевич Бугаев кэлэн көрдө-иһиттэ, дириэктэри үөрэх чааһыгар солбуйааччыларга  анаан саҥа ФГҮӨСка туһаайыллыбыт  лекция аахта. Бу олус туһалаах, элбэҕи толкуйдатар, инники соруктары торумнуурга күүс-көмө буолар. Учууталларга саҥа ФГҮӨС уратыларын, соруктарын  С.Н.Донской –– II аатынан Үөрэҕи сайыннарар уонна идэни үрдэтэр  үнүстүүт     солбуйааччыта Светлана Валерияновна Дедюкина телемост нөҥүө кэпсээтэ.

Түмүккэ Николай Иннокентьевич Бугаев, Чурапчы улууһун үөрэх управлениетын уопсай үөрэхтээһин отделын салайааччыта Сардана Терентьевна Кардашеская, специалистар Мария Семеновна Артемьева, Николай Петрович Артемьев кыттыылаах сэминээр дьаһалларын ырытыы буолла. Кэлбит ыалдьыттар сэминээр үрдүк таһымҥа ааспытын, коллегаларын үлэлэрин  уопутун көрөн элбэҕи билбиттэрин бэлиэтээтилэр.

 Сэминээр оскуола инники үлэтин торумнуурга, учууталлар үөрэтэр ньымаларын сайдыытыгар, хас биирдии педагог бэйэтин үлэтин сыаналыырыгар, анализтаан көрөрүгэр, саҥа ирдэбиллэри олоххо киллэриигэ  олук буолар. Оскуолабыт 150 сыллаах үбүлүөйдээх сылыгар саҥа соруктары туруоран салҕыы кэнчээри ыччаппыт  сайдыытын туһугар үлэлииргэ-хамныырга педагогическай коллектив бэйэтин баҕалааҕын, түмсүүлээҕин көрдөрдө.

Сэминээри тэрийиигэ үлэлэспит С.Н.Донской –– II аатынан Үөрэҕи сайыннарар уонна идэни үрдэтэр  үнүстүүт дириэктэригэр Нь. М. Павловка,  дириэктэри солбуйааччыларга Н. И. Бугаевка, С.В. Дедюкинаҕа, Чурапчы улууһун үөрэҕин управлениетын салайаччытыгар Ю.П. Посельскайга махталбытын тиэрдэбит!

Л.Д. ПЕРМЯКОВА,

С.А.Новгородов аатынан Чурапчы орто оскуолатын дириэктири научнай-инновационнай үлэҕэ солбуйааччы

By admin

Хоруйдаа

Эн e-mail-ыҥ көрдөрүллүө суоҕа. Булгуччу толоруллуохтаах маннык бэлиэлээх - *