Мин кулун тутар 29-31 күннэригэр Алтай өрөспүүбүлүкэтигэр Горно-Алтайск куоракка түүр тыллаах регионнарга иккис төгүлүн ыытыллар олимпиадаҕа кытынным. Былырыын бу олимпиадаҕа кэтэхтэн кыттан 3миэстэ буолбутум.
Быйыл сирэй көрсөн кытынныбыт.Саха сириттэн С.К.Макаров аатынан Чурапчы гимназиятыттан 9 кылаас үөрэнээччитэ Слепцова Света, Сунтаар улууһун Аллыҥа орто оскуолатын 11 кылааһын үөрэнээччитэ Саввинова Настя уонна мин буоламмыт өрөспүүбүлүкэбит чиэһин көмүскээн кэллибит. Олимпиадабыт икки түһүмэхтээх этэ. Бастакы түһүмэххэ Тыва суруйааччыта В. С. Серен-оол «Приглашение в юрту» диэн айымньытын ырыттыбыт. Иккис түһүмэххэ бэйэбит оҥорон, үлэлии сылдьар бырайыакпытын кэпсээтибит. Мин алын кылаастан өбүгэбит төрүт дьарыгын — сылгы сиэлиттэн, кутуругуттан оҥорбут үлэлэрбин сиһилии кэпсээтим уонна ону оҕолорго хайдах үөрэтэрбин билиһиннэрдим.
Уопсай түмүккэ Алтай уонна Башкортостан оҕолорун кэннилэриттэн
3 миэстэни ылан үөрүүм- көтүүм үгүс.Барыта сэттэ регионтан кэлбит отучча оҕону кытта билсэн, кинилэр таҥастарын-саптарын көрөн сэргээн, култуураларын кэпсииллэрин сэҥээрэн кэллим. Маны таһынан араас интэриэһинэй музейдарга, куорат устун, кытыы сытар нэһилиэктэргэ экскурсияҕа сырытыннардылар, историяларыттан кэпсээтилэр.
Бу сырыыбыттан мин олус элбэх саҥаны, сонуну билэн-көрөн кэллим. Түгэнинэн туһанан, саха тылыгар, литературатыгар үөрэтэр учууталбар Борисова Алина Николаевнаҕа барҕа махталбын тиэрдэбин.
Наташа СЕМЁНОВА,
Мэҥэ Хаҥалас улууһун К. О. Гаврилов аатынан Бүтэйдээх орто оскуолатын 11 кыл. үөрэнээччитэ