Муус устар 8 кунугэр Н.Н Окоемов аатынан Курбуһах орто оскуолатыгар “Вешников ааҕыылара” буолан ааста. Санатан эттэххэ, Курбуһахтан төрүттээх биллиилээх лирик-поэт Гавриил Григорьевич Вешников аатынан Республикатааҕы ааҕыылар хас да төгүлүн ыытыллаллар. Бу сылга 4 түһүмэҕинэн ыытылынна: научнай ааҕыылар, хоһоон ааҕааччылар, эдэр айааччылар уонна тылбаасчыттар күрэхтэрэ.

Кыттааччылар 3 секцияҕа үлэлэрин көмүскээтилэр. Ол курдук, «Г.Г. Вешников олоҕо, айар үлэтэ», «Аныгы саха поэзията», «Саха поэзиятыгар Саха АССР ». Хоһоону дорҕоонннохтук ааҕыы көрүҥҥэ 2 секция үлэлээтэ. Ол курдук, «Баал Хабырыыс хоһоонноро»  уонна «Саха АССР төрүттэммитэ 100 сылыгар аналлаах хоһооннору ааҕыы». Нууччалыы уонна сахалыы хоһооннору айан кытыннылар. Маны таһынан Баал Хабырыыс «Сааскы самыыр» хоһоонун нууччалыы, английскайдыы о.д.а омук тылларыгар тылбаастаан холоннулар.

Быйыл хаһааҥҥытааҕар да элбэх оҕо кыттыыны ылла. Барыта 198 үлэ ырытылынна. Үөһээ Бүлүү, Ньурба, Орто Халыма, Чурапчы, Өлүөхүмэ, Мэҥэ  Хаҥалас, Горнай, Дьааҥы, Бүлүү уонна Таатта үөрэнээччилэрэ кытыннылар.

Мин салайааччыбынаан Мария Артуровналыын «Аныгы кэм поэзията» секцияҕа эдэр айааччы, бэйэтэ уол оҕону иитиигэ бырайыактардаах Дорҕоон Дохсун Ворогушин туһунан үлэбин көмүскээтим. Конференцияҕа бастакы холонуум, сүрэхтэниим буолар. Республика араас муннугуттан оҕолор дакылааттарын кэпсээтилэр. Маннык хабааннаах тэрээһиҥҥэ кыттан киһи сүрдээҕин сайдар, атын оҕолору көрөн уопутурар, саҥара, кэпсии үөрэнэр эбит диэн санааҕа кэллим.

Максим НАУМОВ,
Курбуһах орто оскуолатын  7 кылааһын  үөрэнээччитэ

By admin

Хоруйдаа

Эн e-mail-ыҥ көрдөрүллүө суоҕа.