Нам улууһун Дмитрий Федотович Алексеев аатынан 1 Хомустаах орто оскуолатын коллектива быйыл Россия үрдүнэн «Педагог уонна наставник» сылыгар, Сахабыт сиригэр Yлэ сылыгар билиибитин түмэн, эрчиммитин эбэн, араас кѳлүѳнэ мындыр сүбэтин холбоон айымньылаахтык үлэбитин саҕалаатыбыт.
Ол курдук кулун тутар 31 күнүгэр П.И.Кочнев аатынан Тулагы орто оскуолатыгар методическай десант үлэлээтэ. Икки ѳттүттэн учууталлар араас маастар – кылаастары, тѳгүрүк остуолу ыыттылар, уопут атастаһыыта буолла.
Учуутал идэтэ аныгы үйэ тэтимиттэн туораан хаалбакка олоҕу кытта тэҥҥэ хардыылаһан иһэри эрэйэр. Ол курдук хас биирдии учуутал маастар – кылаастарга араас интэриэһинэй сатабылларын, ньымаларын кѳрдѳрдүлэр. Математика, нуучча тыла курдук сүрүн предметтэргэ биир кэлим эксээмэҥҥэ бэлэмнэнии, үѳрэнээччини кѳҕүлүүр араас ньымалары, холобурдары, албастары туттуу маастар кылаастары икки еттүттэн кѳрдүбүт, иһиттибит.
Хаһаайыттар оҕо сатабыллаах буола улаатарыгар оскуола агропрофильнай хайысхалаах үлэтэ улахан тѳһүү күүс буоларын, оҕолор оҕуруот аһын, үүнээйи олордон, бройлер чоппуускалары, индюктары инкубатордаан нэһилиэнньэҕэ атыыга таһааран хамнастаналларын, оҕолор сайдалларыгар усулуобуйа тэрийэллэрин эттилэр. Оскуолаларын олоҕун билиһиннэрдилэр, кэтэх хаһаайыстыбаларын кѳрдѳрдүлэр.
Түмүккэ, 1 Хомустаах орто оскуолатыгар «Самообучающаяся школа» проект ситиһиилээхтик үлэлээбитэ номнуо хас да сыл буолла, методическай десаннар бу проект биир сүрүн хайысхатынан буолаллар. Оскуолабыт үлэтин сырдата, уопут атастаһа Хаҥалас, Горнай, Мэҥэ Хаҥалас улуустарыгар туһалаах сырыылар буолбуттара. Маннык тэрээһиннэр, атын оскуолаҕа тиийэн бэйэ – бэйэттэн үѳрэнии, икки ѳттүттэн сибээс олохтуурга, кѳҕүлээһиҥҥэ үчүгэй хамсааһыҥҥа олук буолар. Инникитин икки оскуола сибээһи быспакка, ыкса үлэлэһэргэ диэн баҕа санааларын эттилэр. Ыалдьытымсах Тулагы орто оскуолатын үлэһиттэригэр барҕа махтал!
Т.А. ЖИРКОВА,
Д.Ф. Алексеев аатынан 1 Хомустаах орто оскуолатын учуутала