Мин И. М. Павлов аатынан Чурапчы орто оскуолатыгар «Память» байыаннай-патриотическай кулуупка 6 кылаастан саҕалаан дьарыктанабын. Маҥнай 2016 сыллаахха оскуолабытыгар  Александр Андреевич Оконешников салайан үлэлэспит «Эрчим» диэн сайыҥҥы лааҕырга сылдьыбытым. Онно элбэҕи билбитим, дьарыгы олус сөбүлээбитим. Аан бастаан автоматы 2 мүнүүтэни быһа ыспытым, хомуйбутум. Онтон атын оҕолор олус түргэнник ыһаллар-хомуйаллар этэ. Ону көрөн «мин эмиэ итинник түргэн буолуохпун баҕарабын» диэбитим. Ол кэннэ үчүгэйдик үөрэнэн , чочуйан дьарыктанан барбытым.

Онтон биһиги «Память» байыаннай-патриотическай кулууп оҕолоро «Снежный барс» байыаннай-патриотическай оонньууга, “Эдэр Карбышевецтар” байыаннай сборга уонна военизированнай эстафета курдук күрэхтэһиилэргэ кыттан кэккэ ситиһиилэрдээхпит.

Ол курдук, биир улахан ситиһиибит диэн 2019 сыллаахха алтынньыга Москва куоракка баран кэлбиппит. Сүрүн сыалбыт: оскуолабыт, улууспут, республикабыт аатыттан, Аҕа дойду сэриитигэр олохторун толук уурбут, саха буойун салааттарын кэриэстээһин, кинилэр, сылдьыбыт суолларынан айаннааһын, саха хорсун буойуттарын ааттарын үйэтитии уонна Ильмень күөл киэҥ киэлитигэр охтубут буойуттарга, бырааттыы көмүллүү сиригэр төрөөбүт төрүт буордарын илдьэн кутуу этэ. Ону таһынан, Москва куорат оскуолаларын военнай патриотическай кулууптарын кытта билсиспиппит, уопут атастаспыппыт. Байыаннай чаастарга, памятниктарга, музейдарга сылдьан элбэх билиини ылбыппыт.

Кулун тутар ыйга буолан ааспыт республиканскай «Cнежный барс» байыаннай-спортивнай күрэххэ мин бастакы холонуум , кыттыым буолар. Улуус сүүмэрдэммит хамаандатыгар оскуолабытыттан 2 буолан киирбиппит. Күрэх 6 түһүмэхтээх этэ. Олорго бастакы иккис миэстэлэри ылан, уопсайа 30 очкону хомуйан бастаабыппыт. Автомакка бастыҥ бириэмэни көрдөрбүппүттэн олус үөрэбин. Миигин өйдүүр, күүс-көмө буолар төрөппүттэрбэр, бииргэ дьарыктанар доҕотторбор уонна учууталларбар махталым муҥура суох.

Саша СЕМЕНОВА,
10 кылаас, И.М. Павлов аатынан Чурапчы орто оскуолата

By admin

Хоруйдаа

Эн e-mail-ыҥ көрдөрүллүө суоҕа.