Биһиги дьиэ кэргэн – эһэм, аҕам уонна мин спорт араас көрүҥүнэн дьарыктанар, кыра да буоллар бэйэбит холбутугар ситиһиилэрдээх дьон буолабыт. Онон бу ыстатыйабар ол туһунан кэпсиэхпин баҕарабын.
Эһэм, Жирков Иван Иванович, 1950 сыллаахха кулун тутар 11 күнүгэр Амма Мээндигитигэр төрөөбутэ. Кини 1968 сыллаахха Амматааҕы Короленко аатынан орто оскуоланы бүтэрэр. Омскайдаагы лётнай техническай училищега үөрэнэн 1972 сыллаахха туйгуннук бүтэрэр. Авиатехник диэн үөрэҕи баһылыыр. Үөрэҕин лейтенант авиации диэн званиелаах бүтэрэр.
Оскуолаҕа үөрэнэр сылларыттан тустуунан, хапсаҕайынан утумнаахтык дьарыгыран 1 разрядтаах тустуук аатын сүкпүтэ. Ол курдук, Саха АССР оҕолорго 1966 сыллаах чемпиона. Улахан дьоҥҥо оройуон хас да төгүллээх чемпиона. Майаҕа буолбут Бастакы Манчаары Оонньууларын 2 миэстэлээх призера, 1967с. Нальчик куоракка ыытыллыбыт РСФСР көҥүл тустуу чемпионатыгар 3 миэстэҕэ тиксэри ситиспитэ.
Иллэҥ кэмигэр кинигэ ааҕарын ордорор. Билигин бочуоттаах сынньалаҥҥа олорор.
Аҕам, Степанов Айталын Валерьевич, 1973 сыллаахха Абаҕа нэһилиэгэр төрөөбүтэ. Эдэр сылдьан элбэх спорт көрүҥүнэн дьарыктанар этэ: волейболунан, баскетболунан, мас тардыһыынан, тенниһынан.
1999 сылга республиканскай теннис турнирыгар 3 миэстэ, 1997 сыллаахха республиканскай мас тардыһыы күрэҕэр 3 миэстэ, 1997 сылга республиканскай волейбол турнирыгар 1 миэстэ буолбута.
Бэйэм туспунан кэпсиир буоллахпына, мин 2004 сыллаахха төрөөбүтүм. Спордунан дьарыктанарбын сөбүлүүбүн, тренерым Попов Семен Семенович. Кини көҕүлээһининэн мас тардыһыытын секциятыгар начальнай кылаастан сылдьабын. Ону таһынан волейболунан, футболунан, баскетболунан, тенниһынан дьарыктанабын, оскуола чиэһин көмүскүүбүн.
Республикаҕа мас тардыһыы күрэҕэр 2 миэстэлээх призербун, улууска 3 төгүллээх чемпиоммун, республиканскай курэхтэһиилэргэ 1, 2, 3 миэстэлэрдээхпин. Иллэҥ кэммэр аҕабар көмөлөһөбүн, кинигэ ааҕабын.
Ити курдук биһиги дьиэ кэргэн спордунан быстыспат ситимнээхтик дьарыктанан кэллибит, нэһилиэкпитигэр, улууспутугар, республикабытыгар ыытыллар спортивнай күрэхтэргэ өрүү кыттабыт, ситиһиилэнэбит, спорт сайдарыгар бэйэбит кылааппытын киллэрэбит.
Айураан СТЕПАНОВ,
Амма улууһун Мээндиги орто оскуолатын 11 кылааһын үөрэнээччитэ